|
Неделя мясопустная,
|
Стихи: Егда судяй земли судие всех сядеши,
Приидите, онаго гласа, достойна и мене усуди.
В сий день втораго и неумытнаго пришествия Христова память творим, юже Божественнейшии отцы по двою притчу положиша, яко да не кто во ону Божие Человеколюбие уведав, леностно поживет глаголя: Человеколюбив есть Бог, и егда греха отлучуся, готово имам все совершити. Сей страшный день зде учиниша, да смертию и чаянием будущих злых устрашивше, леностно живущыя к добродетели возведут, не надеющыяся к Человеколюбному точию, но взирати яко и Праведен есть судия и отдает комуждо по делом его. Инако же, и душам прешедшым, подобаше приити и судии: образ же некий, и настоящий праздник: понеже убо конец всех праздников полагается ныне, якоже и он всех будет по нам конечный. Подобает бо смотрити, яко в будущую неделю начало мира, и самое от рая падение положат Адамово: настоящий же всех дней конец, и миру самому. В мясопусте же сию положиша, сокращающе, мню, пищу и объядение страха ради праздника, и к милости ближняго нас созывающе. И инако: понеже питавшеся изгнахомся из едема, и под судом быхом и клятвою: посему настоящий положиша праздник, и яко хощемъ (имамы) в другую неделю Адамом, по образу едемскому изгнатися, дондеже Христос пришед паки нас возведет к раю. Второе же пришествие речеся, зане и первее плотию к нам прииде, но тих и без славы: ныне же с преестественными чудесы приидет, и с явленною светлостию с небес и с телом, яко да познан будет всеми: яко сей есть иже и первее пришедый, и род человечь избавивый, и судити паки хотяй сам, аще добре данная ему соблюде. Когда убо будет сие пришествие? никтоже весть: сие бо и Господь апостолом скры. Тогда убо знамения некая яви предварити, яже нецыи от Святых пространнее изъясниша. Глаголется же, яко по седмих тысящах лет пришествие его будет. Прежде же его пришествия приидет антихрист, и родится, яко глаголет Святый ипполит римский, от жены скверны, и девицы мнимыя, от еврей же сущи от племене данова, иже бяше отрок Иаковль: и ходити убо имать по Христу проходя жительство, и чудеса совершит, елика убо и Христос действова, и мертвыя воскресит. Обаче по мечтанию вся содеет: и рождение, и плоть, и прочая вся, якоже глаголет Апостол. (2 Фес. Зачало 275.) И тогда, глаголя, открыется сын пагубы, во всякой силе и знамениих и чудесех ложных: обаче не сам диавол в плоть претворится, якоже из дамаска глаголет Иоанн: но человек от блуда родився, все сатанино действие приимет, и внезапу востанет: таже благ и кроток всем явится. И глад тогда велий будет: угодит людем, и Божественная писания пройдет, и посту навыкнет: и понудится от человек, и царь проповестся: и возлюбит множае еврейский род, и во Иерусалим достигнет, и храм их воздвигнет. Прежде же седмих лет, якоже глаголет даниил, приидет енох и илиа, проповедающе людем не приимати его: сей же емь их умучит, таже и главы их отсечет. Благочествовати же изволившии далече отбегнут, ихже в горах обрет, демонми искусит: умалятся же седмь лет оная избранных ради, и глад будет велик, стихиам всем превращаемым, яко потребитися вмале уже всем. По сих же внезапу яко молния с небес Господние пришествие будет, предъидущу честному его Кресту: и огненная река клокощущи ему предъидет, всю землю от скверны очищающи. Ят же будет абие и антихрист, и его слуги, и предадятся вечному огню. Вострубившым же Ангелом, приидет внезапу от конец земли, и от всех стихий, всяк человеческий род во Иерусалим, яко среда мира той: и тамо седоша престоли на суде: обаче с своими телесы и душами, всем к нетлению престихиованным, и един имущым зрак: и тем же стихиам на лучшее приемшым изменение. И разлучит единем словом Господь праведныя от грешных. И пойдут благих делатели, вечный живот приемлюще: грешнии же в вечную паки муку, и никогдаже сих престание будет. Ведомо же, яко не поста тогда взыщет, и наготы, и чудес, Христос, добра бо и сия: но множицею сих лучшая, милостыню яве и простыню (сострадание). Речет бо праведным и грешным шесть неких заповедей: взалках бо, и дасте ми ясти. возжадах, и напоисте мя. странен бех, и введосте мя. наг, и одеясте мя. болен бех, и посетисте мя. в темнице бех, и приидосте ко мне. елико бо сотвористе единому сих меньших, мне сотвористе: яже может всяк кто сотворити по силе. тогда убо всяк (Фил. зачало 240.) Кто исповесть, яко Господь Иисус Христос, во славу Бога Отца. Муки убо, яже сщенное Евангелие предаде, сия суть: (Мф. зачало 105.) Тамо будет плачь, и скрежет зубов: червь их не скончается, и огнь их не угаснет, и (Мк. зачало 42.) вложите его во тьму кромешную. Яже убо вся светло Церковь Божия приемши непщует, пищи (сладости) убо и Царствию небесному быти, с Богом Святых спребыванию, будущему оным сиянию всегдашнему и восхождению. Мучению же и тьме, и сицевым от Бога удалению и душам совестию иждивению, како леностию и пищею временною Божественнаго сияния лишишася. Неизреченным человеколюбием твоим Христе Боже, желательнаго твоего гласа нас сподоби, и сущым одесную тебе сопричти, и помилуй нас, аминь.